PRISENTAZIONE DI U SITU

U CPIE Corti Centru Corsica– A Rinascita, hà vulsutu creà u situ « Corti d’Eri » è d’animà lu cù tutti quelli chì puderebbenu avè a voglia di reghjunghje issa dimarchja.

Cuntendu a storia di a cità  di Corti, attraversu  intaglie, ritratti, filmetti è ducumentu, hà da dà à i Curtinesi un accessu à a so memoria è serà a vera mediateca di a cità curtinese.

Incù parechje millaie di ritratyti da u XVIIIu à u XXu seculu dighjà raccolte, Corti d’Eri hè u situ internet nant’à a cità curtinese da a so nascita sin’à oghje, ramintendu i so stalvatoghji, u so patrimoniu, i so abitanti è e so figure storiche. Serà u guardianu di ricordi di u passatu di a cità, è un armeghju di a memoria lucale.

U scopu hè di suscità a curiosità di i ghjovani è di l’anziani nant’à u passatu di a cità : Quali eranu l’artigiani nant’à u Corsu Paoli ? Induve era a merria ind’è l’anni 1960 ?  Cosa eranu i cugnomi ? Quali sò i persunnaghji di a cità ? Vi ricunnoscerete o micca nant’à i ritratti di scola ? Vi ramintate di u Partitone è di u Partitellu ? Cosa eranu e grande manifestazione di a vita relighjosa ? A ricchezza di a vita assuciativa di a cità incù i carnavali, A Rinascita di u Vechju Corti, A Mannella, a sucietà musicale « La Cortenaise », l’USCC.

E magine di issu situ, à u serviziu di a memoria di Corti, puderanu à termine esse utilizzate da l’associu, pè fà spusizione, edità opere specifiche o affiurà altre edizione. U fondu sera dinò messu à dispusizione di circadori, sopr’à tuttu universitarii.

Issu situ, micca cummerciale, participativu, s’hà da arricchisce pocu à pocu da a partecipazione di l’internauti, di sturiani, di circadori, di cullezziunisti o di depusitarii di ducumenti cù un rapportu cù i scopi di u situ.

Serà pussibile d’evoluà di pettu à a ricchezza di i ducumenti ricezziunati.

Antoine FERACCI